Ураджэнка г. Жодзіна. У 2006 г. скончыла СШ №8 з архітэктурна-мастацкім ухілам. Вучаніца многіх жодзінскіх мастакоў: Хлус Наталлі Анатольеўны, Ступакова Уладзіміра Іванавіча, Кароль Жанны Мікалаеўны, Цігарава Сяргея Васільевіча, Цераева Івана Міхайлавіча і іншых.
У 2011 г. скончыла Беларускую дзяржаўную акадэмію мастацтваў па напрамку спецыяльнасці “Дэкаратыўна-прыкладное мастацтва (вырабы з тэкстылю)”, у 2012 г. – магістратуру, у 2015 г. – аспірантуру БДАМ. У 2013 г. стажыравался на кафедры тэкстылю Вільнюскай мастацкай акадэміі.
У 2016 г. абараніла кандыдацкую дысертацыю па тэме “Беларускія традыцыйныя вясельныя строі маладых ХІХ – першай паловы ХХ ст.”, навуковы кіраўнік: кандыдат мастацтвазнаўства, дацэнт А. Г. Васільева. З 2011 г. працуе ў Беларускай дзяржаўнай акадэміі мастацтваў.
Працуе як мастак па тэкстылю ў розных тэхніках (лямцаванне, батык, габелен, ткацтва, вышыўка і г.д.), шмат эксперыментуе з матэрыялам. Актыўная ўдзельніца рэспубліканскіх і міжнародных творчых праектаў. Сябра секцыі маладых мастакоў і мастацтвазнаўцаў грамадскага аб’яднання “Беларускі саюз мастакоў” (з 2014 г.).
Узнагароды. Мае дыплом ІІІ ступені Міжнароднага конкурсу маладых мадэльераў “Водограй” (Украіна. Косава, 2009), падзяку Міністра культуры Рэспублікі Беларусь (2011), дыплом ІІ ступені ХІХ Рэспубліканскага конкурсу навуковых работ студэнтаў (2012), стала лаўрэатам (І месца) ІІ Беларускай трыенале дэкаратыўна-прыкладнога мастацтва ў намінацыі «Дэбют. Наватарства» (2014).
Мастацкая выстава твораў жодзінскіх мастакоў з фондаў Жодзінскага краязнаўчага музея "Прастора для думкі..." (Гарадская выставачная зала (вялікая), вул. Дзеравянкі, 14б).
Рассыльная (Багачова) Вераніка Юр'еўна
